الشاهين
13-06-2009, 06:47 PM
السلام عليكم ورحمة الله وبركاته
أخواني الأعزاء..
تعمدت أن أكتب هذا الموضوع بالذات.... في الحوارات والنقاشات... لأنني في الحقيقة أريد أن أشرككم معي في هذه القصة الحقيقية التي حدثت لي والتي تحولت إلى موضوع ....في رأيي الشخصي ....مهم جدا ويستحق أن أستجمع آرائكم فيه ...
و إليكم قصتي مع الشايب أبومطر ....
أولا... وقبل كل شي أبومطر شايب من الجماعة... والحقيقة أطلقت عليه اسم مستعار وهو ( أبو مطر ) كما أن أحداثها قديمة جدا ( عشان محد يشغل الأواكس ويرتاح شوي ) :)
في إحدى ليالي الشتاء البارده كنا معزومين ل عشاء عند أحد الجماعة في البر... وبيض الله وجه معزبنا... والله يكثرخيره ...عزالله أنه وفى وكفى... جزاه الله خير ولاهو مستغرب منه ...بعد ما تعشينا مباشرة .. خويي اللي جيت معه لظرف خاص وطارئ مشى أول واحد.... وقالي أنه ماراح يطول وبيجي ياخذني...طبعا حلفت عليه أنه ما يجي وقلت له أنا أبلقى من يوديني ... وبعد جهد جهيد ... اقتنع الرجال وسرى وهو ماهو راضي.. وبعدها بفترة سروا الضيوف والجيران وكذلك وبعضا من الجماعة ....طبعا طول الفترة هذي... كنت أراقب أبومطر الشايب اللي بيني وبينه ميانه حبتين أكثر من الموجودين .. واللي أقدر نوعا ما أطلب منه يوصلني... ولأني دريت بعد أنه جاي لحاله قلت فرصه بعد :).. المهم ..شفت العالم مشت ما صدقت خبر... وأنا أقوم أشتال المركه وأجيبها عند أبومطر وبصوت حنون جدا( تراكا يابومطر ارتك ) :) وأقعد أسولف معه وأضحك ... ولامنه نطق بكلمة ... أرخيت له أذني لعلمي أن الشيبان في الوقت الحالي يحبون من يصغي لهم :) ويحسسهم بأهمية مايقولون :) ..( لا يزعلون علي الشيبان تراني أمزح ) المهم جتني الصدمه يوم قلت له يابومطر الليل سرى ... وتلقى أم مطر هالحين ماغفت عيونها... وتدق على الشرطة تدورك .. قال بضحكة فيها الثقة .. أم مطر وأنا أبوك ماعاد تبي الا فرقاي ... وأنا وأخذ يأشر على المركاه ويقول هذي وسادتي ويأشر على بشته وهذا لحافي :)...قلت في نفسي ... عزالله أني أمرحت معه الليله هنيا بس الله المستعان :)... المشكله ماني عامل حسابي لا فراش ولا بشت ولاحاجه ما معي غير البالطو اللي على ظهري... وقلت الله كريم .. أجل أبذكره بكره أني خويه يوديني معه... وفعلا قلت له يا أبومطر السالفه كذا وكذا .... وأنا خويك بكره إن كان ماعندك شغل توديني معك ... رحب أبومطر الله يجزاه خير وقالي لو تبينا نسري سرينا هالحين ... قلت لاوالله نبا نمرح وبكره نمشي ... شوي والا معزبنا جاينا الله يجزاه خير يقول تبون فرش قلنا لا سلامتك كلش معنا :) ولانبي منك الا تستريح وترقد .. وراح الرجال .... وجلست أنا أبومطر نسولف على شبة النار ... قالي أبومطر: يافلان . قلت : سم يا أبومطر . قالي أنا جاني فلان بن فلان الفلاني ( شخص اسمع به ولا هو بسيحاني ) قلت وش فيه . قال أبومطر : ينشدني عن (ولد فلان بن فلان السيحاني ) جايهم يخطب ولا يعرفونه . ويقول أبومطر : لأني سيحاني ينشدوني لأنهم ما يدرون يعطونه البنت والا لا .. وأكمل حديثه أبومطر يقول : وأنا يا ولدي( الكلام موجه لي ) ابتلشت وقلت الرجال أبوه طيب وأهله طيبين وأما الولد والله أني ما أعلم عنه شي. يقول أبومطر استغربت من رد الرجال لي . قلت وش فيه وش قالك يا أبومطر . قال أبومطر: .يقولي الخاطب رجال ماهو ورع ومن جماعتك ولا تعرف عنه شي. ثم تركني وراح وبعد مدة يقول أبومطر : ردوه ماعطوه . وبيني وبينكم أبومطر شكله متضايق يقول أنا يمكني أخطيت لو أني مادح ابن عمي لو ما أعرفه .. قلت يا أبومطر أنت قلت الحقيقة وماعليك هذا أمر مقدره الله .. بدأ أبومطر يتكلم فالموضوع اللي أبي أشرككم فيه قال الوقت هذا ماهو مثل وقتنا ماعاد تعرف بني عمك لا شبابهم ولا بناتهم .. الشيبان والعجايز تعرفهم ..وأما الشباب ما تدري عنهم صاحين والا مجنن :) حاولت أمزح معه شوي قلت : يا أبومطر بتقنعني أنك تعرف الشيبان اللي من دورك زين . قال : والله يا ولدي أني أعرفهم وأبخصهم.. وقام يتكلم عن الخلطة والزيارات اللي كانت بينهم على ظروف الحياة المعيشية الصعبة .. وصعوبة الاتصال في ذاك الوقت . ويقول : كنا نعرف بعضنا زين .. قلت: يا أبومطر الشباب الصغار والبنات في ذاك الوقت ما تعرفونهم . قال : بالعكس الشباب الصغار نشوفهم مع أبوانهم دايم ونسولف معهم ونهرجهم ويهرجونا والبنات الصغار مع أمهاتهن .. يقول أبومطر كان اللي بيخطب ما ينشد مثل هالحين والا يتعب ما يلقى اجابات شافيه ..
التفت لي أبومطر وقالي تعرف فلان السيحاني قلت نعم . قالي وش لونه من رجال . قلت : وستين نعم . قال : تعرف عياله قلت أيه وقمت أعددهم . قال : صبرك شوي فلان هذا ( واحد من عياله ) وش لونه من رجال . سكت شوي قلت ماعليه . قال ماعليه ويش يعني يتحمل مسؤولية ؟؟ رجال يتحمل مسؤولية مره لا زوجوه ؟ رجال تشوفه يقوم بمسؤلية أهله ؟ ويقوم بطلباتهم ؟ تعرف منهم خوياه ؟ شفته في المسجد دايم ؟ قلت : يا أبو مطر على هونك العلم عند الله وربي وربه الله . قال :عاد تدري إنا قبل نعرف عن بعضنا كل هالمعلومات وأكثر لو بينا وبين بعض آلاف الكيلومترات . ثم قال :والله إن ابن العم هالحين والبعيد معلوماتك عنهم وعرفك عنهم سيم سيم . لا و يمكن البعيد تعرف عنه أكثر من ابن العم .
قلت : يا أبومطر الحياة تغيرت والظروف اختلفت . قمت أحاول ألطف الجو شوي قلت: منول يوم الفقر والشدة كلن بحاجة الثاني وهالحين وقت الرخا (اللهم لك الحمد ) الناس مستغنيه عن بعضها لين يجي وقت اللي يدورون فيه المره لولدهم ثم تشوف جماعتك يفترون :) . قال أبومطر : وهذي المصيبة لا الولد تلقى من يبخصه زين ولا البنت تلقى من محارمك يبخصها ثم قام يضحك أبومطر وهو يقول كنهم سيارات في معرض :) أما غشك راعيها والا توفقت .
قلت يا أبومطر : وش الحل في رايك ؟ علمني ... هذا حال العالم كلها ماهم بني عمك لحالهم ..
قال: ياولدي والله ودك اللي ماتشوفه يجلس مع بني عمه ويخالطهم ويهرج مع الرياجيل ودك أن أهله ما يتعبون حالهم ويدورون له مره .. ثم استرسل بحرارة أبومطر وقال : أنت ما تشوف فالمناسبات الكبيرة ما يجيك الا العواده والعجايز وان نشدت العود وين العيال يا أبوفلان قالك دوامات والا مشغولين .. والبنات ما يشافن الا فالعروس ..
قلت : يا أبومطر أنت علامك حارق أعصابك كذا خل الخلق للخالق .
قال أبومطر بعصبية : ودي والله بالسيحانية ماتروح لغير السيحاني .. والسيحاني ماتاخذه الا السيحانية
شبابنا هالوقت ما يبا من بني عمه يصيبه تخوف كبير والاسباب نفسيه غير معروفه .. والكلام ينطبق على البنات برضو ترفض بني عمها دون أسباب مقنعه .
قلت يا أبومطر أثرك منت بسهل أسباب نفسيه غير معروفه .
قال : ياولدي المشكله في الشباب والبنات هالايام ماعندهم معلومات عن بعضهم والمعلومات متوفره عن الشايب والعجوز فقط
لا وبعضهم يدور المزيونه وبس والله ماهمه لا أبوها ولا أمها ولا جدها ..
ولايهمه لبسها ولاأخلاقها وبعض الرياجيل عادي عنده إن لبست عباة كتف والا مخصرة والا لبست جنز تحت العباة
قلت : يا أبومطر عين خير أما اللبس والأخلاق إن شاء الله مافيه الا الزين وبعدين وش عرفك بالمخصر والجنز والكتف :) .
ضحك أبو مطر وقال : والله يا أبوك مابقى مكان الا وأشوف اللبس هذا فيه حتى فالمساجد .
قرب يدينه أبومطر من النار يشوف ساعته قال سرى الليل ياولدي ولاباقي على الصلاة شي مير نبا ننام شوي قبل نصلي الفجر
تلحف بشته الرجال ورقد ... وأنا قمت أراقب النار وأفكر في كلامه .. كلام منطقي واقعي شايب وعاصر جيله وجيلنا شاف الترابط قبل والتفكك الآن.. شاف التمسك بالدين والقيم سابقا وشاف التحرر والانفلات الحالي .. شاف معايير أختيار الزوج في السابق وشاف معايير اختيار الزوج حاليا ... شاف المسؤولية اللي يتحملها الجنسين قبل .. وشاف المسؤولية اللي يتهرب منها الجنسين الآن ..
نظرت له نظره قبل أن استسلم وأغفو على المركاه حتى أيقظني صوت أذآن أبومطر لصلاة الفجر
أرجو منكم أبداء الأراء في هذا الموضوع
أخوكم الشاهين
أخواني الأعزاء..
تعمدت أن أكتب هذا الموضوع بالذات.... في الحوارات والنقاشات... لأنني في الحقيقة أريد أن أشرككم معي في هذه القصة الحقيقية التي حدثت لي والتي تحولت إلى موضوع ....في رأيي الشخصي ....مهم جدا ويستحق أن أستجمع آرائكم فيه ...
و إليكم قصتي مع الشايب أبومطر ....
أولا... وقبل كل شي أبومطر شايب من الجماعة... والحقيقة أطلقت عليه اسم مستعار وهو ( أبو مطر ) كما أن أحداثها قديمة جدا ( عشان محد يشغل الأواكس ويرتاح شوي ) :)
في إحدى ليالي الشتاء البارده كنا معزومين ل عشاء عند أحد الجماعة في البر... وبيض الله وجه معزبنا... والله يكثرخيره ...عزالله أنه وفى وكفى... جزاه الله خير ولاهو مستغرب منه ...بعد ما تعشينا مباشرة .. خويي اللي جيت معه لظرف خاص وطارئ مشى أول واحد.... وقالي أنه ماراح يطول وبيجي ياخذني...طبعا حلفت عليه أنه ما يجي وقلت له أنا أبلقى من يوديني ... وبعد جهد جهيد ... اقتنع الرجال وسرى وهو ماهو راضي.. وبعدها بفترة سروا الضيوف والجيران وكذلك وبعضا من الجماعة ....طبعا طول الفترة هذي... كنت أراقب أبومطر الشايب اللي بيني وبينه ميانه حبتين أكثر من الموجودين .. واللي أقدر نوعا ما أطلب منه يوصلني... ولأني دريت بعد أنه جاي لحاله قلت فرصه بعد :).. المهم ..شفت العالم مشت ما صدقت خبر... وأنا أقوم أشتال المركه وأجيبها عند أبومطر وبصوت حنون جدا( تراكا يابومطر ارتك ) :) وأقعد أسولف معه وأضحك ... ولامنه نطق بكلمة ... أرخيت له أذني لعلمي أن الشيبان في الوقت الحالي يحبون من يصغي لهم :) ويحسسهم بأهمية مايقولون :) ..( لا يزعلون علي الشيبان تراني أمزح ) المهم جتني الصدمه يوم قلت له يابومطر الليل سرى ... وتلقى أم مطر هالحين ماغفت عيونها... وتدق على الشرطة تدورك .. قال بضحكة فيها الثقة .. أم مطر وأنا أبوك ماعاد تبي الا فرقاي ... وأنا وأخذ يأشر على المركاه ويقول هذي وسادتي ويأشر على بشته وهذا لحافي :)...قلت في نفسي ... عزالله أني أمرحت معه الليله هنيا بس الله المستعان :)... المشكله ماني عامل حسابي لا فراش ولا بشت ولاحاجه ما معي غير البالطو اللي على ظهري... وقلت الله كريم .. أجل أبذكره بكره أني خويه يوديني معه... وفعلا قلت له يا أبومطر السالفه كذا وكذا .... وأنا خويك بكره إن كان ماعندك شغل توديني معك ... رحب أبومطر الله يجزاه خير وقالي لو تبينا نسري سرينا هالحين ... قلت لاوالله نبا نمرح وبكره نمشي ... شوي والا معزبنا جاينا الله يجزاه خير يقول تبون فرش قلنا لا سلامتك كلش معنا :) ولانبي منك الا تستريح وترقد .. وراح الرجال .... وجلست أنا أبومطر نسولف على شبة النار ... قالي أبومطر: يافلان . قلت : سم يا أبومطر . قالي أنا جاني فلان بن فلان الفلاني ( شخص اسمع به ولا هو بسيحاني ) قلت وش فيه . قال أبومطر : ينشدني عن (ولد فلان بن فلان السيحاني ) جايهم يخطب ولا يعرفونه . ويقول أبومطر : لأني سيحاني ينشدوني لأنهم ما يدرون يعطونه البنت والا لا .. وأكمل حديثه أبومطر يقول : وأنا يا ولدي( الكلام موجه لي ) ابتلشت وقلت الرجال أبوه طيب وأهله طيبين وأما الولد والله أني ما أعلم عنه شي. يقول أبومطر استغربت من رد الرجال لي . قلت وش فيه وش قالك يا أبومطر . قال أبومطر: .يقولي الخاطب رجال ماهو ورع ومن جماعتك ولا تعرف عنه شي. ثم تركني وراح وبعد مدة يقول أبومطر : ردوه ماعطوه . وبيني وبينكم أبومطر شكله متضايق يقول أنا يمكني أخطيت لو أني مادح ابن عمي لو ما أعرفه .. قلت يا أبومطر أنت قلت الحقيقة وماعليك هذا أمر مقدره الله .. بدأ أبومطر يتكلم فالموضوع اللي أبي أشرككم فيه قال الوقت هذا ماهو مثل وقتنا ماعاد تعرف بني عمك لا شبابهم ولا بناتهم .. الشيبان والعجايز تعرفهم ..وأما الشباب ما تدري عنهم صاحين والا مجنن :) حاولت أمزح معه شوي قلت : يا أبومطر بتقنعني أنك تعرف الشيبان اللي من دورك زين . قال : والله يا ولدي أني أعرفهم وأبخصهم.. وقام يتكلم عن الخلطة والزيارات اللي كانت بينهم على ظروف الحياة المعيشية الصعبة .. وصعوبة الاتصال في ذاك الوقت . ويقول : كنا نعرف بعضنا زين .. قلت: يا أبومطر الشباب الصغار والبنات في ذاك الوقت ما تعرفونهم . قال : بالعكس الشباب الصغار نشوفهم مع أبوانهم دايم ونسولف معهم ونهرجهم ويهرجونا والبنات الصغار مع أمهاتهن .. يقول أبومطر كان اللي بيخطب ما ينشد مثل هالحين والا يتعب ما يلقى اجابات شافيه ..
التفت لي أبومطر وقالي تعرف فلان السيحاني قلت نعم . قالي وش لونه من رجال . قلت : وستين نعم . قال : تعرف عياله قلت أيه وقمت أعددهم . قال : صبرك شوي فلان هذا ( واحد من عياله ) وش لونه من رجال . سكت شوي قلت ماعليه . قال ماعليه ويش يعني يتحمل مسؤولية ؟؟ رجال يتحمل مسؤولية مره لا زوجوه ؟ رجال تشوفه يقوم بمسؤلية أهله ؟ ويقوم بطلباتهم ؟ تعرف منهم خوياه ؟ شفته في المسجد دايم ؟ قلت : يا أبو مطر على هونك العلم عند الله وربي وربه الله . قال :عاد تدري إنا قبل نعرف عن بعضنا كل هالمعلومات وأكثر لو بينا وبين بعض آلاف الكيلومترات . ثم قال :والله إن ابن العم هالحين والبعيد معلوماتك عنهم وعرفك عنهم سيم سيم . لا و يمكن البعيد تعرف عنه أكثر من ابن العم .
قلت : يا أبومطر الحياة تغيرت والظروف اختلفت . قمت أحاول ألطف الجو شوي قلت: منول يوم الفقر والشدة كلن بحاجة الثاني وهالحين وقت الرخا (اللهم لك الحمد ) الناس مستغنيه عن بعضها لين يجي وقت اللي يدورون فيه المره لولدهم ثم تشوف جماعتك يفترون :) . قال أبومطر : وهذي المصيبة لا الولد تلقى من يبخصه زين ولا البنت تلقى من محارمك يبخصها ثم قام يضحك أبومطر وهو يقول كنهم سيارات في معرض :) أما غشك راعيها والا توفقت .
قلت يا أبومطر : وش الحل في رايك ؟ علمني ... هذا حال العالم كلها ماهم بني عمك لحالهم ..
قال: ياولدي والله ودك اللي ماتشوفه يجلس مع بني عمه ويخالطهم ويهرج مع الرياجيل ودك أن أهله ما يتعبون حالهم ويدورون له مره .. ثم استرسل بحرارة أبومطر وقال : أنت ما تشوف فالمناسبات الكبيرة ما يجيك الا العواده والعجايز وان نشدت العود وين العيال يا أبوفلان قالك دوامات والا مشغولين .. والبنات ما يشافن الا فالعروس ..
قلت : يا أبومطر أنت علامك حارق أعصابك كذا خل الخلق للخالق .
قال أبومطر بعصبية : ودي والله بالسيحانية ماتروح لغير السيحاني .. والسيحاني ماتاخذه الا السيحانية
شبابنا هالوقت ما يبا من بني عمه يصيبه تخوف كبير والاسباب نفسيه غير معروفه .. والكلام ينطبق على البنات برضو ترفض بني عمها دون أسباب مقنعه .
قلت يا أبومطر أثرك منت بسهل أسباب نفسيه غير معروفه .
قال : ياولدي المشكله في الشباب والبنات هالايام ماعندهم معلومات عن بعضهم والمعلومات متوفره عن الشايب والعجوز فقط
لا وبعضهم يدور المزيونه وبس والله ماهمه لا أبوها ولا أمها ولا جدها ..
ولايهمه لبسها ولاأخلاقها وبعض الرياجيل عادي عنده إن لبست عباة كتف والا مخصرة والا لبست جنز تحت العباة
قلت : يا أبومطر عين خير أما اللبس والأخلاق إن شاء الله مافيه الا الزين وبعدين وش عرفك بالمخصر والجنز والكتف :) .
ضحك أبو مطر وقال : والله يا أبوك مابقى مكان الا وأشوف اللبس هذا فيه حتى فالمساجد .
قرب يدينه أبومطر من النار يشوف ساعته قال سرى الليل ياولدي ولاباقي على الصلاة شي مير نبا ننام شوي قبل نصلي الفجر
تلحف بشته الرجال ورقد ... وأنا قمت أراقب النار وأفكر في كلامه .. كلام منطقي واقعي شايب وعاصر جيله وجيلنا شاف الترابط قبل والتفكك الآن.. شاف التمسك بالدين والقيم سابقا وشاف التحرر والانفلات الحالي .. شاف معايير أختيار الزوج في السابق وشاف معايير اختيار الزوج حاليا ... شاف المسؤولية اللي يتحملها الجنسين قبل .. وشاف المسؤولية اللي يتهرب منها الجنسين الآن ..
نظرت له نظره قبل أن استسلم وأغفو على المركاه حتى أيقظني صوت أذآن أبومطر لصلاة الفجر
أرجو منكم أبداء الأراء في هذا الموضوع
أخوكم الشاهين